:(
السلام عليكم و رحمة الله تعالى و بركاته



و كيما قريتو في العنوان خوتي وي قاع ولينا نفهمو في البالون قاع ولينا

محللين , و الله ندور في المنتديات نحير , هاذا يقترح في خطة و حاب يبعثها لسعدان

هاذا يقول كان لازم كذا باش نربحو بنتيجة ثقيلة , وهاذا يقول سعدان غلط كي دخل هاذاك

صحيح لمشجع كرة القدم حرية إبداء الرأي أو حتى النقد مي في حدود المعقول

الناس قاع ولات تخطط و تتفلسف و تقترح على الفاف ...إلخ

اليوم و أنا جاي من ليكور ريح حذايا واحد الراجل الله يذكرو بالخير

و كانو واحد ليجان قدامنا يحكو على ليكيب ناسيونال و قاع

أيا دخل معاهم في السوجي وقالهم لا خوتي رايحين نربحو الماتش الجاي 7-2

( ماتش باسكات ) المهم ....

و بداو هوما , ايه قادرين نربحو حتى كثر مي لازم يدخل زياية و يخرج غزال

و يدخل شاوشي نص ميطوو يخلي زياني في الوسط و يلعب 5-4-1 ...إلخ

ولاو قاع مدربين ما فهمت والو , لحقو مام للوقت اللي لازم يدير فيه التغيير

راصي حبس قلت قاع هاذا الشي عدنا في دزاير ! الناس راهي طير قاع هاكا

ايه ما غلطش سعدان كي قال : قاع وليتو تفهمو البالون

قبل جنفي 2010 كاين لي ماكانوش يعرفو بلي كاين إيكيب تلعب بإسم لبلاد

كاين لي جامي تفرجو ماتش لالجيري كي كانت تتخبط

و اليوم اييه صدى الملاعب في الشوارع كل واحد يتفلسف من جيهة

الخاوة قاع سعدانات ,, واش يقرقجك كي نكونو رابحين و تلقاهم

لا كان سعدان دار كذا رانا ربحنا كثر , و لا ماحقوش يدير التغيير هاذاك ..إلخ

و الدليل يضهرنا في بوعزة عدنا ما نتقدنا و هدرنا و قلنا علاش راه يدخل فيه

كل خطرة , و كاين مام لي قالو هاذي معريفة مع سعدان .. مي مع الفيلة العين شافت

و التاريخ سجل ... برك كتبت هاذا السوجي على واش راه صاري في بلادنا

و حبيت نقول خليو الخبز للخباز

و السلام عليكم .

اين سعدانات

صح أخي كلامك صحيح كل الشعب الجزائري أصبحوا مدربيين و ربي يهدينا قاع